من اعداداتي التراثية ( فواهق )

اذهب الى الأسفل

default من اعداداتي التراثية ( فواهق )

مُساهمة من طرف القلم الرشيق في الخميس ديسمبر 28, 2006 9:51 am

مقاطع من قصيدة :

الرفق

للشاعر : ابراهيم الزرزور

هناك ناس ما ساعة اتطيق رفقهم

وهناك ناس تحزن وين ما ترافقهم

هناك ناس ايغلو

وينما اترافقهم رفقهم حلو

ما عمرهم دار الخراب انزلو

وما عمر والي عالصواب سبقهم

وهناك ناس من جوا مثيل السلو

حتى ان كان من بره الله زوقهم

هناك ناس الطوله

حرفتهم ديما يختشو مالمولى

اكرام وعصاره هل نفوس خجوله

ان عاشرتهم ماعاد شي تطلقهم

حتى لو ترافقهم العمر بطوله

حرام ما يديرو فعل به تزمقهم

هناك ناس عصاره

يستاهلوه الشكر مالشعاره

وهناك ناس فيهم كل شي خساره

مغير ثقل فوق ارضه الله خالقهم

حكاية عن ( العقول )

كان والدها مشهوراً بالتوفيق بين الناس لطيبته وحكمته فسألته الابنة كيف تستطيع التوفيق بين المتخاصمين؟ فقال لها إن اختصم لدي اثنين (عاقل وهبل)ناخذ مالعاقل ونعطي مايرضي الهبل لان المثل يقول (العتب علي صاحب العقل) فقالت الابنة : وان تقاضا لديك اثنان (بعقولهم)؟ فقال الوالد : ذوي العقول لا يأتون الي... لانهم سيحلون مشاكلهم بأنفسهم... الم تسمعي المثل الذي يقول (عطيني صاحب عقل نحكي نا وياه)

والشاعر يقول : اللي معاه العرف ما يتوصا

ايدير ما ايليق ويقبلوه اصحابه

فقالت الابنة: وإذا أتاك اثنان (هبل)؟ حينها يا ابنتي يقع والدك في مأزق!

ويقول الأجداد إن للعقول أنواع وهي :

عقل عامر

وعقل ثامر

وعقل دامر

من غناوي الرحا

القزون ما زال قزون و الدمع مالي عيونه

يذوح بين الحواشين ويقول وين الحنونة

الحرث يبي الملاحيح واللي يباتو سهارى

يلحو لحيح المجاريح عطو نومهم للفقارى

ضنيت ما في الضنا خير وربيتهم نين داجو

تموا كما خلفة الطير وين نبتوا ريش فاجو

نصيحة !!

من الشاعر : أبو بكر رابح

ما كل عوام بحار

ولا كل صياد صايب

و لا كل من طار طيار

ولا كل من شاب شايب

ولا كل سكات صبار

ولا كل من عاب خايب

افطن للدنيا

للشاعر والفقيه والقاضي..مفتاح بواعميه الفاخري

الدنيا قديمة حالبة الدهر في قدح

مالكبر بادت نين بانن ضلوعها

تبكي وهي تضحك وتضحك ما البكا

قليل اصلها ما تغر والي بنوعها

وان كان قلت عندي بوع نلحق حدودها

ارتاح يا فتى بوعك ايجي دون بوعها

وعالحال ما تجر الطرف عالناس كلها

وتقعد اتسفي في الخلا في صروعها

بطون النسا

للشاعر : عبدالله بو الروين

تجيبن كبير الشان يابطون النسا

وتجيبن اللي للموجعه حمال

وتجيبن اللي فزاع في ساعة الكدا

واتجيبن اللي قتله صحيح حلال

وتجيبن اللي جوفه امعبا بالهوا

نفيخ وزفير معا خليط هبال

الحكمة في غناوي العلم والشتاوي

ارحم خلايقك في لرض واللي مريض عافيه يا لله

باهي اللي الارزاق عالمولى وما هن عالعرب

قسام العقول رزين عطا وحود و وحود ما عطا

صيوره الحي ايموت وماله نبا فيت العمل

برام واخذك يا عقل ياريتا مرض نين ينشكا

ايجيك امر توحل فيه حتى وانت قاريه تجهله

الدنيا كيف شراب الطل زهاها عمرا ما طول

الدنيا حطاطا وتشيل معاركا مو فارس خيل

ياليام الكن نقلابا عام اجداب و لاخر صابا

جروح

جروح كامدات الروح طبيب ما علي داهن ايجي

جروح كاسرات العظم طبيب ما علي داهن ايجي

جروح طارشات الوذن طبيب ما علي داهن ايجي

جروح سالات القلب طبيب ما علي داهن ايجي

جروح عاميات العين طبيب ما علي داهن ايجي

جروح ساحنات الكبد طبيب ما علي داهن ايجي
avatar
القلم الرشيق
مشرف عـامTitle
مشرف عـامTitle

ذكر
عدد الرسائل : 11
العمر : 33
تاريخ التسجيل : 27/12/2006

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

default مشكور على المشاركه

مُساهمة من طرف حمزة بوحقيفه في الجمعة ديسمبر 29, 2006 11:20 am

ربى ائعطيك الصحه اسملت واربحت واتمنى كل الشباب الليبى يقعد كيفك

وان شاء الله المواضيع اللى نكتب فيهن يعجبنك

حمزة بوحقيفه
مشرف الشعر الشعبي والادبي

عدد الرسائل : 95
تاريخ التسجيل : 11/11/2006

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى